أعلن المستشار تركي آل الشيخ رئيس الهيئة العامة للترفيه عن تصدر فيلم ولاد رزق 3 قائمة شباك التذاكر السعودي حيث أصبح الأعلى إيراد بسينمات السعودية .
فيلم ولاد رزق 3 يتصدر شباك التذاكر السعودي
كتب تركي آل الشيخ على صفحته الرسمية عبر موقع التواصل الاجتماعي “فيسبوك” وعلق قائلا : “ولاد رزق الأعلى ايراد في سينمات السعودية ويكسر رقمين ورا بعض ليتربع في القمه … مبروك لصناع الفيلم وأتمنى أن ينعكس ذلك على التنافس الفترة القادمة لمصلحة الإنتاج العربي … انتظروا خلال شهرين الإعلان عن الدفعة الثانية من أفلام صندوق بق تايم” .
فيلم ولاد رزق 3
جدير بالذكر، تصدر ولاد رزق 3 محرك البحث جوجل خلال الساعات الماضية وذلك بعد عرضه عبر منصة شاهد في 7 نوفمبر الماضي وذلك بعد النجاح الجماهيري الهائل الذي حققه الفيلم حيث استطاع أن يحقق إيرادات غير مسبوقة في وقت قياسي خلال فترة طرحه بالسينمات، كما تمكن من تخطي إيرادات تتجاوز الربع مليار جنيها .
ولاد رزق 3 .. قال طارق الشناوي في تصريحات خاصة لـ “مصر تايمز”: “أي انتعاشه رقمية لصالح السينما طبعا، فيلم ولاد رزق الجزء الثالث هو فيلم مصنوع بشكل جيد، طارق العريان عامل شغل هايل كمخرج، والتقنيات لأن طارق بيجيد اللغة السينمائية الحديثة والجمهور أقبل” .
ولاد رزق 3 .. وأضاف :”الإمكانيات اللي رصدتها هيئة الترفيه إمكانيات ضخمة، ف اتعمل فيلم على مزاج وعلى موجة الجمهور، أنا بعتقد إن الإيرادات دي هتشجع المنتجين إنهم يضخوا أموال أكتر ويحصلوا على مكاسب أكتر، هيبقى لها دور إيجابي” .
ولاد رزق 3 .. وقالت ماجدة خير الله في تصريحات خاصة لـ “مصر تايمز” : “كل الكلام عن الإيرادات القادمة لأفلام متعرضتش متقدرش تتنبأ بيها بتاتا، ولكن الإيرادات الكبيرة اوي لا تعني إن الفيلم عظيم لأن فيه أفلام في التاريخ عملت إيرادات مخيفة ومكانتش الأفضل، يعني يكفي إسماعيلية رايح جاي عمل نقلة وجاب ملايين في وقت مكانتش السينما المصرية بتحقق الإيرادات دي ” .
ولاد رزق 3 .. وأضافت : “الإيرادات الضخمة ليست دليل على جودة الفيلم ومع ذلك ولاد رزق فيه عناصر جذب كتير، فيه كم من النجوم وفيه قصة وموضوع مشوق وفيه إنتاج ضخم ودعاية ضخمة، كل ده ضمنله إن الناس تقبل على مشاهدته وبالتالي يعمل إيرادات ضخمة، والدعاية كانت كبيرة ف ده عمله رواج مش في مصر بس وفي السعودية وفي دول الخليج، وإن التذكرة في الخليج أضعاف التذكرة في مصر، وده أعتقد إنه داخل في الإيرادات” .
ولاد رزق 3 .. وقال عماد يسري في تصريحات خاصة لـ “مصر تايمز” : “طبعا فيلم ولاد رزق كان متوقع ليه إنه يحقق إيرادات غير مسبوقة في السنوات الأخيرة، وده نظرا للإقبال الجماهيري اللي تم رصده في العيد كان إقبال جماهيري كبير، وده متحققش لفيلم مصري من قبل سنة 2010، الإقبال بالشكل ده على دور العرض السينمائي لغاية حفلات الصباح دي محصلتش من قبل 2011” .
ولاد رزق 3 .. وأضاف : “ف طبعا إن الفيلم يحقق نجاح بالشكل ده كان متوقع، ليه الفيلم حقق نجاح بالشكل ده لأن فيه عوامل للنجاح أدت لكدة، عوامل النجاح أولها التسويق بشكل مختلف ومبتكر للفيلم ده أدى لإقبال الجماهير، زائد أن لأول مرة من سنوات من أكتر من 15 سنة نلاقي فيلم أكشن مصري مختلف بمواصفات عالمية، ولأننا للأسف السينما المصرية فاشلة وأعي هذه الكلمة فاشلة في صناعة الأكشن، والدليل عدم إقبال الجمهور الخليجي والشباب المصري على أفلام الأكشن المصري وكان دايما بيشتكوا إن دي أفلام فاشلة، وأنا بجيب الكلمة اللي كان بيتم ترديدها داخل مصر بين الشباب مكانوش راضيين على الأكشن المصري، وكمان كان دول الخليج بترفض توزيع فيلم أكشن مصري أو ميبقاش مهم بالنسبة لها، لأن للأسف افتقدنا القامات اللي كانت بتقدملنا الأكشن المصري بعد وفاتهم” .
ولاد رزق 3 .. وأوضح : “العوامل الكتير مع وجود نجوم ليهم جماهيرية مع قصة هي مش قصة جديدة ولكنه تيمة تم تقديمها قبل ذلك ف كانت تيمة ناجحة وهي التيمة الشعبية اللي هي دايما بتكون عامل جذب بالنسبة للجمهور لدرجة أن الفيلم كان مصنف ولكن كنت بلاقي إن العائلات بتخش الفيلم، وده شئ رصدته أنا بنفسي، وده دليل على حب الجمهور للفيلم، إذا عوامل كتير يعني اتجمعت حتى كمان ضيف الشرف كريم عبد العزيز أضاف للفيلم، الفيلم كله كان فيه مجموعة من عوامل للنجاح وكان فيلم تجاري ولايت وأكشن، فيلم عيد اللي هو الجمهور بيفضلها طول عمره في أفلام العيد ” .
ولاد رزق 3 .. عرض فيلم ولاد رزق 3 ضمن أفلام عيد الأضحى الماضي، وشارك في بطولة الفيلم كل من أحمد عز وآسر ياسين وعمرو يوسف وكريم قاسم وعلي صبحي ونسرين أمين ومحمد ممدوح وأسماء جلال وأحمد الرافعي، ومن تأليف صلاح الجهيني، وإخراج طارق العريان .
ولاد رزق 3 .. تدور أحداث الفيلم بعد مرور سنوات وانفصال الأخوة في طرقهم الحياتية المختلفة. لكن في يوم من الأيام، يعود شبح من الماضي ليلقي بظلاله على ولاد رزق، مما يجبرهم على العودة إلى حياة الجريمة والسرقة مرة أخرى حتى ينجوا بأنفسهم، في عملية مصيرية هي الأكبر والأخطر والأهم في تاريخ ولاد رزق.
