أثارت الفنانة أسماء جلال حالة من الجدل خلال الأيام الماضية وذلك عندما قررت إلغاء متابعة الفنانة هنا الزاهد عبر موقع تبادل الصور والفيديوهات “إنستجرام” .
وحتى الآن لن يتم الكشف عن تفاصيل سبب إلغاء أسماء جلال متابعة الفنانة هنا الزاهد عبر إنستجرام، ولكن وجود بعض التكهنات حول انزعاج أسماء جلال من وسائل التواصل الاجتماعي لوصفها بديلة هنا الزاهد في بعض الأعمال الفنية التي من المقرر أن تعرض خلال الفترة المقبلة وجاء ذلك عندما اعتذرت هنا الزاهد عن بعض الأعمال الفنية ورشحت بعدها أسماء جلال .
آراء النقاد في أزمة هنا الزاهد وأسماء جلال
كشف بعض النقاد عن آراءهم في أزمة أسماء جلال وهنا الزاهد وحول الآراء المتداولة في حلول أسماء جلال بديلة لهنا الزاهد في العديد من الأعمال الفنية .
وقالت الناقدة ماجدة موريس في تصريحات خاصة لـ “مصر تايمز” : “أولا فيه قواعد لازم نفكر فيها وإحنا بنتكلم عن العاملين في الفن، إنه من الممكن تبقى الأعمال الفنية محتاجة لممثلة تبقى مشهورة مثلا وممكن تبقى دلوعة غندورة حاجة زي كدة، وبالتالي لما بتنجح ممكن في الحالة دي بتبقى ممثلة للأدوار دي، ف كل لما يجي دور فيه دلع وكدة يعرضوه عليها، وبعد فترة هذه الممثلة إنها فيه أدوار كتير أهم فتبطل وترفض وتعتذر عنها علشان تروح لأدوار مهمة” .
أسماء جلال بديلة هنا الزاهد
وأضافت : “ولكن القضية هنا مش تصنيف الممثل في تقديري، ولكن القضية هل هو موهوب ويقدر يعمل كل الأنواع، وزمان كان كل الممثلين في مصر يشتكوا من التنميط واحد نجح في دور الشرير يفضل شرير طول عمره، وعندنا نماذج كتير زي توفيق الدقن ومحمود المليجي، يعني محمود المليجي لما عمل الأرض كل الناس بقيت بتقول معقول إحنا كنا ناسيين كل القدرات دي عند الراجل ده” .
وتابعت : “ف المسألة هنا إن المفروض العاملين في السينما وخصوصا الإخراج والإنتاج لأنهم بيتحكموا في الممثلين دلوقتي عليهم فعلا إنهم يتفادوا ظاهرة التنميط دي لأنه مثلا أسماء جلال برغم إنها تنجح في الأفلام دي ولكن أظن إنها عندها إمكانيات تعمل أدوار تانية مختلفة وشخصيات مختلفة وفيها ملامح وصفات أخرى، ف مفيش حد يقدر يحل مكان حد، أنت ليك العمل نفسه وإحنا ملناش دعوة بالسوشيال ميديا لأنها بتتلاعب بينا كثيرا كمشاهدين، وأنا أعتقد إن أسماء جلال مش بديلة هنا الزاهد، وإنها ممثلة موهوبة وممكن تكون لمعت أكتر في أدوار معينة ولكن ده ميمنعش إنها موهوبة وممكن تلمع في كل الأدوار” .
أسماء جلال وهنا الزاهد
بينما قال الناقد محمود عبد الشكور في تصريحات خاصة لـ”مصر تايمز” : “أنا مش شايف إن الموضوع خطير وممكن يعمل مشكلة، طول الوقت كان فيه ترشيحات أي عمل فني بيبقى فيه ترشيح أول وترشيح تاني، ووارد جدا يستبدل ممثل بممثل آخر، بالنسبة للاتنين الاتنين موهوبين وعندهم قدرات وأثبتوا نفسهم والاتنين بيمثلوا الجيل الجديد اللي يناسب أدوار تناسب أعمالهم، وكل واحدة ليها شخصيتها وكل واحدة ليها براعتها الفنية، وأن بحب شغلهم جدا” .
وأضاف : “أنا مش عايز الموضوع ياخد أكبر من حجمه ولا تبقى فيه مشكلة لأن مفيش مشكلة خالص يعني أنا مش فاهم الموضوع ده إزاي واخد أكبر من حجمه، يعني افرض ممثل ده مشغول أو أجره أكبر من ميزانية العمل أو مريض أو عنده عملين في وقت واحد، ولو أنا قولت على أدوار مشهورة جدا هتستغرب جدا التغيير وأحد مهارات الإخراج إنه يجيب الممثل القريب للشخصية، ولما ممثل يتم استبداله ده مش معناها إنه بديل، ده معناه إنه هيقدم الدور من وجهة نظر تانية وزاوية تانية، والاتنين مش بيلعبوا واحدة، الاتنين في سن متقارب أو الاتنين يصلحوا، الفن عبارة عن وجهات نظر وزوايا مختلفة”
