ظهر الفنان أحمد داوود ضيفا ببودكاست فايق ورايق مع الإعلامي إبراهيم فايق وذلك بعد النجاح الهائل الذي حققه فيلم الهوى سلطان خلال الفترة الماضية .
حلقة أحمد داوود بفايق ورايق
تحدث الفنان أحمد داوود عن كواليس تعاونه مع الفنانة منة شلبي بفيلم الهوى سلطان وعلق قائلا : “منة شلبي ممثلة خطيرة، الموضوع زي الكورة لو بتلعب قصاد فرقة جامدة هتعمل نتائج أجمد، ومنة بتفكر في كل التفاصيل وأنت قدامها بيبقى نفسك تبقى زيها وتفضلوا تتبادلوا الأفكار سوا” .
فيلم الهوى سلطان
وكانت المؤلفة رشا الجزار قد كشفت عن تطورات أزمتها مع هبة يسري مؤلفة ومخرجة فيلم الهوى سلطان، وذلك بعد أن اتهمت مؤلفة الفيلم بسرقة الفكرة.
وقالت رشا الجزار في تصريحات خاصة لـ”مصر تايمز”: “أنا كنت النهاردة في النقابة وبكرة هقدم مذكرة رسمية لنقيب المهن السينمائية والموضوع هيبقى عند النقابة والنقابة اللي هتفصل بيني وبينها”.
وأضافت : “وأنا محبش أعمل شوشرة لحد ولا هدفي أشوش على نجاح حد ولا أسرق نجاح حد، ولو مكنتش حريصة على ده مكنتش حاولت لمدة يومين إني أكلم المؤلفة علشان أستفسر منها وللأسف هي مردتش عليا، ف الموضوع بكرة هيبقى في النقابة”.
وردا على منشور هبة يسري قالت: “أنا شوفت اللي هي كاتباه وأنا من يوم الخميس لحد امبارح قبل ما أكتب البوست بساعة أنا بحاول أتصل بيها هي مش بترد عليا، وأنا كنت محتاجة أتكلم معاها واسألها هل أوجه التشابه اللي موجودة بكل هذا الكم من التفاصيل من أين، هل ده توارد خواطر ولا هل ده أنتي، هل أنتي قرأتي ورقي ولا حد اقترح عليكي الموضوع من البداية واللي عايز يقول أي حاجة يقولها، أنا سعيت إني أتواصل معاها وإن أنا أعرف أوجه التشابه دي كلها لأن أنا محتكيتش بيها قبل كدة في حياتي خالص وهي مرديتش عليا، ف أنا كتبت البوست لأنه إحساس صعب جدا إنك تتأذي وأنت تسكت، وبالتالي أنا همشي في الإجراءات الرسمية أنا كنت النهاردة في النقابة وبكرة هقدم مذكرة رسمية للنقيب والنقيب هيقعد معانا احنا الاتنين ويسمع مننا”.
وتابعت عن دعم بعض النجوم لهبة يسري قائلة : “هما يعرفوها أو عندهم علاقة بيها أو هما بيحبوها، أنا معنديش مشكلة بس أنا حاسة إن فيه تسرع في امتى تدعم أصحابك على حساب الطرف التاني، أنتوا صناع المفروض النقابة جهة فصل بيننا والنقابة هتقدر توصل إذا كان فيه حد بيدعي على الآخر يعني إذا كان أنا بدعي عليها أو هي بتدعي عليا أو فعلا ده توارد خواطر النقابة اللي هتفصل، ومش من المهنية إن يكون فيه حد من الصناع يقول فيه فلان صح وفيه فلان غلط، أنا شايفة إن ده مش من المهنية، وكنت أتمنى إن الناس تنتظر حتى النقابة تفصل في الموضوع ولكن من حق أي حد يدعم أي حد ومن حق أي حد يقول اللي هو عايزه، وفيه كلام كتير مش مظبوط بس أنا مش هرد، وأنا مش هدفي إني أعمل شوشرة لأن للأسف هما قالوا كلام كتير مش حقيقي ومش عايزة أنساق في إني أدخل في مهاترات”.
